I campanari de Travensol, tuti co' le so done e con le fameje intiere dei "mini-campanari", i s'à trovà ne la corte del Presidente Osvaldo Borelli (émo scoperto che la se ciàma Corte Capelina dal 1300...) par la çena anuale: ghéra el Sindaco Fabio, el Paroco don Franco e anca don Antonio "prete vecio tornà a casa dopo tanti ani a Cogollo; ghèra anca l'Adelina "Assessor che fa de tuto" (la podarì èssar el sindaco de dimàn) e altri de la compagnia.

Par l'impegno de arlevàr zoéni campanari i merita 'n 'aplauso, e mi ghé l'ò fato con un dopio soneto. Lézìlo e batì le man!

CONVIVIO  DEI  CAMPANARI  DE  TRAVENSOL

Fagnano di Trevenzuolo, Corte Cappellina

30 settembre 2007. A.M.

Nel tempo nó iè memorie lontane

i bòti e i segni de le campane,

me vén in mente quéle de Bovolon

che le faséa sempre din don, din don.

E la storia, se sa,la se ripete,

e ghè campane grosse e picoléte:

de la Bastìa me ricordo la campanèla

che la faséa din din-èla, din din-èla.

Ma chi sémo a casa nostra,

con sonadóri gran campanari

ancó né par da ‘ndar in giostra

e vèci e zóeni i n’è tuti cari:

Travensól Fagnan e Roncolevà

i fa dì din-don che i altri nó gà.

* * *

Ghémo de tuto, fin anca i butéléti,

ghémo il maestro che i numari ciàma

diséndo “silenzio e stè tuti chieti

ch’el mondo né guarda par la nostra fama”;

ghè po’ el presidente che fa gran figura

cantando la lode dé ci tira la sóga,

a tuti el ghé dise che fin che la dura

el gà na carica e che nessùn ghè la tóga.

Ghè po’ i campanari, quei veci e pitocchi,

quei senza ambission ma sempre presenti

ch’i tira la corda anca quando l’è a tòchi

e i sóna da morto coi bòti più aténti:

par sonàr fasémo continui traslochi

ma sempre sónémo felici e contenti.