VOLA IN ALTO, BIGETO

In morte di Luigi “Bigeto” Ambrosi

(24 Novembre 2006. AM)

L’è na campana da morto. Ci sia?

Un sgrisolón curioso par savér ci è ‘ndà via.

Ma sì, è morto proprio el Gobéto!

Be’, in fondo l’éra anca un po’ vecéto.

Me ricordo ch’el me ciamàa “maestro”,

nel so modo de far, l’éra sempre de èstro,

anca se nol g’à mai vu gran fortuna,

e ne la vita l’à sognà de là de la luna.

Adesso anca ti te ghè le ale

e pur la goba t’è sbrissià zó da le spale;

ma ti, che te sì restà come ‘n butìn

t’è zà catà in paradiso el to postesìn:

da grando te si restà buteléto,

adesso vola, vola in alto, Bigeto!