SON’  ‘NDA’ A LA FESTA DEL PAN

So’ ‘ndà a la festa del pan

par veda se l’è proprio vera

che quando l’è belo fresco e san

l’è l’unica merenda sincera.

L’ho vardà fin che i lé impasta:

sensa tanti grassi drento

l’è sempre bón quel che basta

pur che ghé sia farina de formento.

E de bèlo ghéra l’arte d’i fornari

che tirando la pasta bèl bèl

i strolica i formati più vari

che te tài co’ le mane o col cortèl,

i s’inventa d’i stampi sempre rari

e ti te magni el pan e anca el séstèl!