SE NO ‘L LE SFREGOLA EL TONTONA

Dopo vintisète ani de matrimonio,

e prima altri diése de fidanzamento

- ma desso no se usa più: jè tuti amici -

el cor no ’l se rassegna: el vol far ancora la so parte.

Tanti ani ormai rugolè via,

ogni tanto calcòsa che s’incrica,

no passa giorno che no ghé sia

‘n dolor che chi o là te strica.

Ma el cor l’è quel d’un buteleto:

anca desso nol vede che la so dòna

e ancora el se agita e no l’è chieto,

e …se no’l le sfregola el tontona!

El se contenta solo de guardàrla,

de sfiorarla magari pian pian,

ghé basta anca solo basàrla

sui labri, e… strucàrla con le man.

Un vecio proverbio l’è storia che parla:

bóca e mane ga sempre vint’an!