PAR PENA UN VECIO PENEL

(AM. Memorial di Giovanni Ferrarini e Piergiorgio Ramanzini.

Trevenzuolo -  Arena verde.

7 Settembre 2007)

Strabucàndo in un gran bussolòtto

con drénto tuti i tipi de colór

me son catà in un gran missiòto

de ricordi nati nel fondo del cor.

Ho pensà de scrivar na poesia

usando par péna un vecio penèl

e anca un poca de fantasia:

me par de essar ancora un butèl

e i ricordi i vola ancora,

i me porta su le ale del vento,

e tuto rivedo come alora

e anca lo scrivo… e son contento.

Dèsso rivédo Giovanni a la posta

col far serio del diretór:

con posa vivace ma composta

da gran regista e anca atór

‘nde l'uficio nóo, e prima in quel vècio,

sempre presente, l’à fato cariéra;

me guardo atórno e anca nel spècio:

ch’el sia ‘ndà via …no’ me par vera!

E me ricordo la man soprafina

de Piergiorgio, el nostro pitór,

ch’el rendéa al mèo la velina

anca se lu no’ l’era l’autór;

po’ el sé sfogàa con la batéria:

colpi maestri in mezo al trambusto

e lu co’ la so fantasia

el batéa el ritmo al colpo giusto.

No se fèrma de scriva el me penèl

ma el colór càla nel bussolòto,

… me s’inèbia i oci con un gran vél

e mi m’ingrópo come ‘n stupidòto.