LA ME GATA

‘nde na tiepida séra de magio

sentà soto ‘l portego co la me gatina

la guardo e éla con coraggio

la me slonga pian pianin la so zatina.

L’è na gata zoena e tuta nera

e zà la spèta i so primi gatini,

la me guarda co’ na musa sincera

po’ la me salta in brazzo come fa i butini.

Mi la còcolo e ghé liscio el pel,

éla la se stima come fa na gran dama,

fin la se lustra che la par un penel,

come se la volesse parlar la me ciàma

e par che la me diga, guardando el ciel:

“st’ano anca par mi sarà la festa de la mama”