IN APRIL L’E’ ZA PRIMAVERA

In april l’è za primavera,

le piante ormai gà le fojoline,

se slonga i giorni che no par vera

l’è tuto ‘n cantar de passarine.

In tuti i campi atorno

l’è un gran sbociàr de fiori,

ghé n’è de più bèi ogni giorno

e de l’arcobaleno i gà tuti i colori.

L’arieta tiepida che inguanta

i fiori tènari de le çiresare,

un ciel celeste che t’incanta

se te lo guardi ne le ore più ciare;

… e sul far de la sera canta

le racoline ‘nde le risare.