DE DRIO A LA CIESA, ‘NDI CAMPETI

NOI/Fagnano

Settembre 2007

Scórlo la testa, ma córe la memoria

ai tempi del pòro don Arieti,

çirese e frutari i à fato la storia

lì dé drio a la ciésa, ‘ndi campéti.

El parsémolo de la Melia gò in mente

e i pomidori par l’asilo de le suore,

le tegoline nétè ‘ndé le brente,

rancurando salata e melanzane mòre.

Dèsso sémo deventè tuti siori

e no gavemo più gnanca l’orto,

ma gavémo zughi de tuti i colori

… e pur no torna più el riporto,

par fin persi tuti i vèci onori,

el mondo va sempre più storto.

***

No se volemo ben come alóra,

i schéi sempre pitocchi i ne lassa

se dal cor no rivémo a butàr fora

de le nostre borie la gran  matassa;

no serve el balón e gnanca le bòce

se rivàr sempre primi volémo;

sul vecio campanil ghè là ‘na croce:

sbassàndo i oci in su guardémo.

Recuperemo le vecie rajse,

quéle ch’à insegnà i nostri vèci

che i tegnéa da conto anca le brise

guardàndose drento e nò néi speci

girandoghe l’orlo a le camise

con poco vin e graspìa a séci;

***

così le brustolade lé ciàpa senso

anca se sti tempi i è balzani,

e se ricàta – almanco mi lo penso –

l’amicizia e i valori nostrani

ciapàndo la vita dal giusto verso

e tolendo le robe come le vén

senza tórsela se le va de traverso

e metendo par primo el volerse ben.

Così ghé sarà posto par tuti,

longa vita gavarà el Circolo Noi

basta no far difarenze tra brai e bruti

e lassar zugar i pàri e anca i fioi:

se bisogna, parlémo come i muti

e fémo i grandi sui picoli imbròi.

AM