CARNEVAL EL VEN A PRIMAVERA

Passà l’epifania, sémo a carneval:

no ghè scherzo che risparmia ‘na malìa

e ognuno stròlica de métarghe sal

sóra le miserie de la compagnia.

Se càta fora el sior e pur la sióra,

e manco se risparmia el poaréto,

par che tuti i rompa a ogni ora,

par tuti ghè ‘n giudissio …benedeto.

L’è ‘n’ocasion che a tuti ghé par giusta

de far festa, anca se fra tante rogne

‘na olta a l’ano tuti se insusta

e no jé proprio solo de le … begogne.

Ma carneval el vén a primavera

quando zà vola le prime farfaléte:

anca ‘na màscara devénta sincera

se la gà el profumo de le violete.